স্ত্ৰী প্ৰত্যয় । Stree Pratyay

স্ত্ৰী প্ৰত্যয় কি? অসমীয়া ভাষাত কি কি স্ত্ৰী প্ৰত্যয় আছে? উদাহৰণ দি বুজাই লিখা।  [2013]
উত্তৰঃ-স্ত্ৰী প্ৰত্যয় [Stree Pratyay]
আধুনিক ভাষা বিজ্ঞানত যাক বদ্ধৰূপ বুলি কোৱা হয়, ব্যাকৰণত তাকে প্ৰত্যয় বোলে। শব্দৰ মুক্তৰূপৰ পিছত যোগ হোৱা স্ত্ৰী-লিংগবাচক প্ৰত্যয়ক স্ত্ৰী প্ৰত্যয় বোলে। পুংলিংগৰ পৰা স্ত্ৰী লিংগ কৰিবলৈ কেইবাটাও প্ৰত্যয় ব্যৱহাৰ কৰা হয়, সেই প্ৰত্যয়বোৰক স্ত্ৰী প্ৰত্যয় বুলি কোৱা হয়।
অসমীয়াত ভাষাত চাৰিটা স্ত্ৰী-প্ৰত্যয় পোৱা যায়, সেই কেইটা হ’ল- ঈ, অনী, নী আৰু ৰী।
‘ঈ’ প্ৰত্যয়ৰ ব্যৱহাৰঃ–
কিছুমান ব্যঞ্জনান্ত শব্দৰ পাছত ‘ঈ’ লগ লাগি প্ৰত্যয় সিদ্ধ হয়। যেনে-
নিলাজ + ঈ = নিলাজী
জন + ঈ = জনী
পিচাশ + ঈ = পিচাশী

কেতিয়াবা আকাৰান্ত পুংলিংগ ৰূপৰ আকাৰত স্ত্ৰী প্ৰত্যয় ‘ঈ’ বহে। যেনে-
পেহা + ঈ = পেহী
বুঢ়া + ঈ = বুঢ়ী
মামা + ঈ = মামী
কেতিয়াবা আকাৰান্ত শব্দৰ আকাৰৰ ঠাইত ঈ-কাৰ বহে। যেনে-
অজলা -> অজলী
পগলা -> পগলী
‘অনী’ৰ ব্যৱহাৰ–
সাধাৰণতে ব্যঞ্জনান্ত শব্দৰ পাছত ‘অনী’ প্ৰত্যয় যোগ হয়-
কমাৰ + অনী = কমাৰনী
ফুকন + অনী = ফুকননী
ভকত + অনী = ভকতনী
‘নী’ৰ ব্যৱহাৰ–
কিছুমান স্বৰান্ত পুংলিংগৰ পাছত ‘নী’ প্ৰত্যয় যোগ হয়। যেনে-
গৃহস্থ + নী = গৃহস্থনী
কলিতা + নী = কলিতানী
বৰুৱা + নী = বৰুৱানী
‘ৰী’ৰ ব্যৱহাৰ–
কিছুমান শব্দৰ পাছত ‘ৰী’ যোগ হৈ স্ত্ৰী প্ৰত্যয় সাধন হয়। যেনে-
কলা + ৰী = কালৰী
ডেকা + ৰী = ডেকেৰী
বেঙা + ৰী = বেঙুৰী