आइला ऐ आइला । Aila ae aila – सनेस्बर बर’ । Soneswar Boro

1. आइला ऐ आइला
हाबासालिनि जाइला
जोंहा आगै एम्बु सिख्लानि
एम्बु बंग्लाया आथिं थोंसे बायला
ऐ आथिं थोंसे बायला

सेरेद ऐ सेरेद
ताव सेरदों सेनेद
हौवा गोदान एम्बु बंग्लाया
खिफिदों फेरेद-फेरेद
ऐ खिफिदों फेरेद-फेरेद।

आइया ऐ आइया
लामा दथानि खाया
हाबासालिनि बैराथि सिख्लाया
गुंखि एल’ एल’ गय खावनायखौ
जोंलाय जालिया
ऐ जोंलाय जालिया।
एल’ ऐ एल’
दंग’ फारानि गाल’
खिफि फाद्रा बारलाम्फाया
गय राननाया ददजाय गोबाल’
ऐ ददजाय गोबाल’।

खाम दामदों फ्रिंदा फ्रिंदा
सिफुं सुदों थर’रि थर’रि
जथा दामदों थिंथा थिंथा
सेरजा हुदों गलिंग’ गलिंग’
गंगोना दामदों गं गलायल’ ललायल’
अ’ बर’फोर मोसादो बाज्ल’ बाज्ल’।

बोथोरा दिनै रानस्रावस्राव-रानस्रावस्राव
जादों जोंलाय गोदावस्रांव गोदावस्राव
एम्बु बग्लानि हाबा जादों
एम्बु बंग्लिजों हाबा खुंदों
अखा हादों अखा हादों
अ’ आफा इसोर नोंखौ सिबिदों
अ’ आफा इसोर नोंखौ हांख्रायदों।

एम्बु गाबदों एबं एबं
अखा हादों ज्राम-ज्रुम, ज्राम-ज्रुम
खुसि जाबाय जोंनि जिउ
रंजाखांबाय जोंनि जिउ
अदे अदे
अ’ लोगोफोर बयबो मोसादे
अ’ लोगोफोर बयबो रंजादे।

* एम्बु हाबानि मेथाइ

2. उखुम बैसांनि खुमब्रा । Ukhum baisangni khumra- Soneswar Boro

उखुम बैसांनि खुमब्रा गोर्लैजों
उखुम बैसांनि लाउ गोर्लैजों
हाबा होगोन दे जोंनि सनामालिखौ।

नाङा हाय नाङा आय’
बर’ हिनजावनो
गय जरा लानानै
फाथै जरा लानानै
लानानै थांफैदो दे बर’ हिनजावखौ।

आथाल बैसांनि हाइजें गोर्लैजों
आथाल बैसांनि खुमब्रा गोर्लैजों
हाबा होगोन दे जोंनि सनामालिखौ।

नाङा हाय नाङा आय’
बर’ हिनजावनो
बारि खनानि गय ददेरेजों
बारि खनानि फाथै सिनारिजों
लानानै थांफैदो दे बर’ हिनजावखौ।

3. गोथौ लैथोनि सेराव । Gwthou lwithwni serao – Soneswar Boro

 गोथौ लैथोनि सेराव जों लोगो
सेंगोरा सिखोला सिखाद गोदान
मिनि हाला हाला
लायो जों आखल गियान।

बारनाय बिबार बादि
राइजोनि बिथोराय जों
दैनि दाहार बादि
गोहोनि बारदै सिखोला जों
हारिनि मुसुखा फोलेरनि साखाथि
खालामो जों धियान।

नामदानि हाजोनि
जुथुमदों लोगोसे
गोथार गोजौ जों गोहो गोहो
आबैनि आबौनि
सोदोमस्रि हासारमनि
खौसेयै मारदाव रोहो रोहो
फोलेरनि नेर्सोनजों
खैफोद मुलुगाव
बोथोर गोदान।

लिरगिरि : बानेस्बर बसुमातारि 

4. बिबारनि सुजुनाय माला । Bibarni sujunai mala

आंनि बिबारनि सुजुनाय मालाखौ
सोर जोहोलावनो गानहोबावनो
आंलाय गानहोबावनो
आंनि बिबारनि सुजुनाय मालाखौ
सोर जोहोलावनो गानहोबावनो
आंलाय गानहोबावनो
बेखौ नायो बेबो नङा
बैखौ नायो बैबो नङा
मुलुगाव आलायनो रावबो गैया नामा
आंनि बिबारनि सुजुनाय मालाखौ

बेरे सिखिरि जानानै आं
माला लायै लायै नागिरो
दावसिन दावला जानानै आं
नायदिंबायो बुहुम बिखायाव
आंनि बिबारनि सुजुनाय मालाखौ
सोर जोहोलावनो गानहोबावनो
आंनि बिबारनि सुजुनाय मालाखौ

उखुम मुदानि फारौआ आय’
जरा लायै लायै मोसाग्लांबाय
आंनि सुजुनाय मालाया आय’
लासै लासैनो राननो हमबाय
आंनि बिबारनि सुजुनाय मालाखौ
सोर जोहोलावनो गानहोबावनो
आंलाय गानहोबावनो
आंनि बिबारनि सुजुनाय मालाखौ

*सुजुगिरि, देंखोगिरि आरो खनगिरिनि मुंखौ मोनथियोब्ला,
अननानै कमेन्ट बक्स (Comment box) आव खिन्था हर।