1. হামাৰু ৰাম চৰণে । Hamaru Ram charane – Madhavdev

ৰাগ : মাউৰ (মাহুৰ)

তাল : পৰি

ধ্ৰুং— 

হামাৰু ৰাম চৰণে মন লাণ্ড

মায়াময় সয়ল দুনিয়াই,

জানি ভৰম তেজি জাগু।

পদ—

ধন জন জীৱন যৌৱন জায়া

কায়া ঐসব ধান্ধা।

বৈচন বিজুৰী উজৰি মিলাৱত

ভাহে নাহি দেখা আন্ধা।

হৰিপদ পঙ্কজ ভৱ ভয় ভজ্ঞন

তাহে চিন্তি চিত্ত লাই।

হৰিকহু চৰণ পঙ্কজ-ৰজ-কিঙ্কৰ

মাধৱ দীন গুণ গাই।

2. হৰিকো নাম নিগমকু । Hariko nam nigamku

ৰাগ : মাউৰ

তাল : পৰি

ধ্ৰুং— 

হৰিকো নাম নিগমকু সাৰ। 

সুমৰি আতি অন্ত্য জাতি

পাৱত ভয় নদী পাৰ।।

পদ—

পাপী অজামিল হৰিকো সুমৰি নাম-আভাস।

অতয়ে কৰ্ম্মক বন্ধ ছোড়ি পাৱল বৈকুণ্ঠ বাস।

জানি আহে লোক হৰিকো নামে কৰু বিশোৱাস

সকল বেদক তত্ত্ব কহয়ে মূৰুখ মাধৱ দাস।

3. কমনে বিছুড়ি মন । Kamane bichhuri mon

ৰাগ : গৌৰী

তাল : জ্যৌতি

ধ্ৰুং— 

কমনে বিছুড়ি মন বহু ৰাম বায়া।

ভাৰত বৰিষে মানৱী তনু পায়া।।

পদ—

দেৱে নাহি তনু মানৱী পায়।

নাম চিন্তামণি হাতে হৰায।।

জানি ৰাম চৰণে কৰু আশা।

কহতু মাধৱ হৰি-দাসকু দাসা।

4. হৰি গুণ কৈছে বিছুৰি । Hari gun kaichhe bichhuri

ৰাগ : ধনশ্ৰী

তাল : পৰি

ধ্ৰুং— 

হৰি গুণ কৈছে বিছুৰি মন ৰে।

এ ভৱ সাগৰে তেৰি তাৰক ৰে।।

পদ—

নিগম নিগূঢ় বাণী হৰি গুণ সাৰু

তাহে বিছুড়ি ভয় তৰয়ে নপাৰু।

কলি কলমষ ঘোৰ পয়োধি মনাই।

বিছুড়ি গোবিন্দ গুণ তাৰক নাই।

কহয় মাধৱ দাস দীন হীনমতি।

ইহ পৰলোকে মেৰি গোবিন্দ সে গতি।।